Alindahaw sa Bukidnon: “Jose vs. Jose” nagpadayon

September 27, 2006

Ni Mel B.Madera
—————–

Misamot pag-init  ang panagbangi nila ni Gobernador Jose Ma. Zubiri, Jr. ug Valencia City Mayor Jose Galario, Jr., ang duha nga parehong kapartido politikal sa LAKAS-NUCD. Ang naasoy’ng away nag-ulohan  “Jose batok Jose” o kaha  “Junior batok  Junior”.

Kon sabagay, hapit na man sab ang piniliay sa mga lokal nga mga opisyal. Posible nga mas-mograbe pa  kon dili man ugaling masulbad ang ilang deperensiya.

Ang away sa duha nadala sa kahanginan. Adunay block timer sa usa ka sibyahanan sa radyo sa dakbayan sa
Valencia nga mikusokuso sa pagkatawo sa gobernador, apan aduna say  ubang taga-radyo nga nanalipod kaniya. Ning ulahi, matod pa, gihanggat nag sinumbagay ni gobernador ang maong komentarista sa radyo tungod sa iyang kapungot.

Nindot paminawon, sa? Pero ang mga naminaw bation na sa kalibog kon asa ang tinuod sa duha. Na hala sige! Kumbati mo diha sa inyong dula sa politika. Ang importante lang, mao nga, isip nag-alagad nga suluguon sa katawhan, dili unta makompromiso sa inyong away ang inyong serbisyo sa publiko.

 –oooooOooooo–

Gisuspende ni Governor Jose Ma. Zubiri, Jr. ang Assistance to Indigent Families in Crisis Situation (AIFCS) sugod Agosto 14 ning tuig. Ang matag miyembro sa Sangguniang Panlalawigan adunay AIFCS alang sa mga katawhan nga moduol kanila tungod sa panginahanglan.

 Apan ning ulahi matod pa adunay anomalya nga nakita ang gobernador kabahin sa maong programa. Busa, sori na lang mga kapareho ko nga mga indigents, kay suspendido man diay ang AIFCS nga puwede makatabang unta kanato  sa atong panginahanglan.

Kamo sab unta nga adunay access sa AIFCS ayaw sab tawon mo pag-abusar kay ma-angin intawon ang mga indigents sa inyong tinunto diha!!! Kon sa bagay, matod pa, dugay ra man kuno na nga palusot diha, pero karon pa lang daw nalilian ug nasusihan. Tsk…Tsk…Tsk…Tsk… Suwabe ang dating nato diha ah!

–oooooOooooo–

Matod pa, adunay
usa ka ahensiya sa gobyerno ang gi-imbestigahan tungod sa mga anomalya sa mga proyekto. Proyekto? Kanang mga ghost projects ba? Tsk…Tsk…Tsk…Tsk…Na sab? Gawas pa sab ana, naa pa sab payroll padding. Ahah! Mga pilyo jud mo da!

Mao diay nga maayo ang kahimtang nila ni Madame ug Sir, kay dako man diay silag mabira gikan sa pondo sa gobyerno. Hunong na mo anang inyong kalaki uy! Basin dili moabot ang inyong edad sa 150 anyos kay gabaan mo ug sayo. He-he-he-he…!

Advertisements