Bantay Balita: 1 ka bata patay,14 angol sa aksidente

September 27, 2006

QUEZON, BUKIDNON – Usa ang patay samtang 14 ang naangol sa dihang nabalintong ang usa ka Fuso Jitney sa National Highway, Sityo Kipolot, Barangay Palacapao ning lungsod.

Ang biktima naila nga si Michelle Mahilum, 9 anyos, residente sa Barangay Kahusayan, lungsod sa Kitaotao. Gidala  sa tambalanan ug anaa sa talandugon nga kahimtang si Carlito Cancamo, 49, residente sa dapit sa nahitaboan.

Ang laing 13 ka mga pasahero  nakaangkon sa mga bun-og ug gagmay’ng samad sa ilang lawas.

Nasuta sa imbestigasyon nga ang maong jitney  gimanehoan sa tag-iya nga si Pepito Emeterio, residente sa maong dapit.

Matod pa,  ang sakyanan gikan sa lungsod sa Sityo Rawari, Barangay Kahusayan, Kitaotao padulong sa Barangay Poblacion ning lungsod.

Migula nga nabalintong ang sakyanan sa tuong bahin sa kalsada human nawad-an sa brake  ug ang maong sakyanan nakaangkon usab og kadaut. (BANTAY BALITA)

Advertisements

Bantay Balita: Optic wire sa Globe giputol

September 27, 2006

QUEZON, BUKIDNON – Giputol sa wala masayri nga mga suspetsado bag-ohay lang ang fiber optic feeble wire sa poste Globe Telecommunications Company nga nahimutang sa Barangay Palacapao ning lungsod.

Usa ka Ronel Domel, 36, residente sa Barangay Buhangin,

Davao
City ang mitaho sa buhatan sa kapolisan kabahin sa maong insidente. Matod pa nga ang wire sa poste numero 168 sa Globe sa maong dapit ang tinuyo nga giputol ug gipahagsa sa mga gituhuang grupo sa mga extortionist.

Matod pa,  ang kontraktor sa maong proyekto nakadawat sa extortion text gikan sa wala mailang tawo pipila ka oras sa wala pa ang insedente. Padayon pa ang imbestigasyon sa kapolisan kabahin sa maong insedente.

Nasayran usab nga sa unang mga higayon, pipila na ka mga tower sa Globe sa tibuok nasud ang gipangdaut kay matod pa nagdumili sa paghatag sa extortion money ang management sa Globe. (BANTAY BALITA)


Bantay Balita: Pulis gi-ambush, suspetsado patay

September 27, 2006

QUEZON, BUKIDNON – Patay ang
usa sa duha nga mga armadong tawo nga miatang sa duha ka mga pulis ning lungsod nga mihigayon sa paggukod sa mga suspetsado bag-ohay lang. Ang insidente nahitabo sa Sityo Kawilihan, Barangay Butong ning lungsod.

Ang namatay naila nga si Policarpio Estrada, alayas Junjun, hingkod, minyo ug residente sa Sityo Anibong, Sinilayan, Barangay Dologon, lungsod sa Maramag. Naigo si Estrada sa iyang walang dughan hinungdan sa iyang kamatayon.

Nasayran nga ang duha ka mga pulis nga nadistino sa BUSCO Police Community Precinct ang mihimo sa paggukod sa duha ka mga armadong mga tawo diin ang
usa kanila mao si Estrada. Wala mailhi ang kauban ni Estrada.

Segun sa taho sa kapolisan ning lungsod nga samtang mipahigayon sila sa paggukod sa duha ka mga armadong tawo, ang mga suspetsado ang mipahimutang sa ilang kaugalingon sa pag-atang kanila (pulis) sa sagbuton nga bahin sa dalan sa maong dapit.

Dugang pa nga gipusil sa mga suspetsado ang mga pulis sa dihang mokabat 15 metros na lang ang ilang kalay-on.

Ang mga pulis mibalos sa pagpusil sa mga suspetsado hinungdan sa kamatayon ni Estrada.

Nakasibat ang wala mailhing kauban ni Estrada. Narekober sa nga polis ang
usa ka kalibre .38 rebolber ni Estrada nga kargado sa 3 ka mga bala ug 2 ka kapsula. (BANTAY BALITA)


Bantay Balita: Cashier gitulis

September 27, 2006

KITAOTAO, BUKIDNON – Gitulis sa duha ka tawo ang usa ka cashier sa Mindanao Rubber, Inc. (MRI)  sa Teachers Village, Barangay Poblacion ning lungsod kaniadtong Septiyembre 9, pasado alas 11:00 ang takna sa buntag.

Ang biktima naila nga si Rommel Mallumbaga, 28, ulitawo. Gitulis ang biktima sa duha nga wala mailhing suspetsado  sa compound sa MRI. Ang MRI nalambigit sa buy and sell sa raw rubber products.

Nakuha sa mga suspetsado gikan sa biktima ang duha ka cellular phones nga nagkantidad og P112,000.00 ug salapi nga mokabat P35,440.00.

Sa imbestigasyon nasuta nga ang mga suspetsado nga mo-edad sa 30 anyos ug nagpakaaron-ingnon nga mga kliyente,  mibunot sa ilang mga armas nga kalibre .38 nga rebolber ug kalibre .45 nga pistola, dayong deklara sa tulis. Ang mga suspetsado daling misibat sakay sa
usa ka STX motorsiklo kolor pula padulong sa lungsod sa Don Carlos.
Mipahigayon sa pag-gukod ang mga polis apan wala na nila masapon ang mga tulisan. (BANTAY BALITA)


Bantay Balita: Mag-uuma gipatay

September 27, 2006

SAN FERNANDO, BUKIDNON – Gipatay ang usa ka mag-uuma  sa Purok 7, Barangay Kalagangan ning lungsod kaniadtong Septiyembre 7, alas 10:30 ang takna sa gabii.Ang biktima naila nga si Alfredo Magdadaro, 33, minyo, mag-uuma, residente sa Purok sa maong barangay. Ang biktima nakaangkon sa samad dinunggaban sa iyang ilok, tiyan, duha sa iyang tuong bat-ang ug sa walang kumigking. Si Magdadaro nadala pa sa Bukidnon Provincial Hospital ning lungsod apan ang doktor nga miatiman kaniya  mideklara nga patay na siya sa wala pa mahidangat sa maong tambalanan.

Ang suspetsado naila nga si Rejon Loway, 21, residente gihapon sa naasoy’ng dapit. Gamit ni Loway sa krimen ang usa ka hunting knife ug dali kining misibat human sa krimen. Apan sa pagka alas 11:00 ang takna sa buntag sa sunod adlaw nasikop siya sa mga miyembro sa Barangay Peace and Safety Officer (BPSO) sa Sityo Baogan sa maong barangay.Si Loway gitugyan sa buhatan sa kapolisan ning lungsod ug kasamtangan kining detinado sa pagkutlo ning balita. Giandam na sa kapolisan ang pagpasaka sa kaso batok sa suspetsado. Nasuta sa imbestigasyon sa kapolisan nga ang motibo sa insedente sa mao ang wala pagsinabtanay tungod sa kahubog. (BANTAY BALITA)